قواعد الشغل اللي تخصك بغض النظر عن سياسات ولوائح المؤسسة اللي بتشتغل فيها :) 

- التزم ... التزم بالمواعيد، التزم بكلمتك، التزم بمبدئك، التزم بقيمك، التزم بمظهر لائق ونظيف...النجاح والالتزام وجهان لعملة واحدة.

- الشغل رزق مكتوب من المولي لاحيزيد ولاحيقل لكن اهم حاجة فيه البركة علشان كدة متبقاش رخيص وتشتغل عصفورة. 

- علاقتك بالناس اللي في الشغل علاقة زمالة يعني ايه ... يعني علاقة صحية تسمح بصباح الخير، لقمة صغيرة ناكلها سوا، نبارك لو حد اتجوز اوخلف نعزي لو حد اتوفي ونشتغل كتيروبس... متعملش صحاب من الشغل لان مش بنعرف للاسف نفصل الحياة الشخصية عن الحياة المهنية. 

- الشغل مش المدينة الفاضلة ولاعلاقة ابدية، في حاجة اسمها دورة حياة الموظف في الموسسة تبداء بالتعيين وتنتهي باستقالة سواء معاش او تغيير لمكان افضل...سيب انطباع كويس ومتخصرش حد ومترزعش الباب وانت خارج! حتي لومشيت مسيرك تتعامل مع المكان تاني بشكل مختلف.

- راعي ربنا وارضي ضميرك في شغلك اتفقنا قبل كدة اهم حاجة البركة في الرزق.

- لكل مجتهد نصيب مهما كان في ظلم... ده وعد ربنا "إِنَّا لا نُضِيعُ أَجْرَ مَنْ أَحْسَنَ عَمَلا" يعني من الاخر مديرك مالوش عندك غير شغلك...

- انت انسان يعني حياتك ليها اركان كتير... شغل،عائلة، صحاب، رياضة، هواية... نجاحك في الشغل وفشلك في الباقي معناها فشل ذريع في ترتيب وقتك واولوياتك وبالتالي حتكون دايما تحت ضغط ومكتئب...الحياة حلوة استمتع.

- نجاحك في شغلك ووصولك لمكانة كويسة مش معناه انك تانتخ  لسة المشوار طويل ولسة ناقصك كتير اشتغل علي نفسك وطور منها وقبل كل ده اعرف نفسك وحدد امكانياتك.

- التخطيط ثم التخطيط...اي نجاح في الدنيا لازم يكون مربوط بخطة ... خطط لحياتك المهنية وحياتك الشخصية دور دايما علي الافضل ... التغيير هو اللي بيعلمك وبيكبرك.

- الشغل بيعلم والاحتكاك اليومي بالناس بيعلم والاخطاء بتعلم والمرمطة بتعلم علام عمرك ما حتتعلموا في مدرسة او جامعة 

- واخيرا بطل تشتكي طول الوقت بطل تلوم الناس والظروف بطل تقول اعذار....اشتغل!